ᲫᲐᲦᲚᲔᲑᲘᲡ ᲯᲐᲜᲛᲠᲗᲔᲚᲝᲑᲘᲡ ᲞᲠᲝᲑᲚᲔᲛᲔᲑᲘ ᲯᲘᲨᲔᲑᲘᲡ ᲛᲘᲮᲔᲓᲕᲘᲗ
დროთა განმავლობაში ძაღლები საგრძნობლად განვითარდნენ და დღეს უკვე არსებობს მათი უამრავი სახეობა, რომელიც ერთმანეთისგან განსხვავდება ზომით, ფორმით, ბეწვის ტიპით, ხასიათითა და სხვადასხვა მახასიათებლით. ძაღლების მოშინაურებით სარგებელი ადამიანებმაც ნახეს და ძაღლებმაც (ბოლოს და ბოლოს, ისინი ადამიანის საუკეთესო მეგობრები არიან), მაგრამ გარკვეული გენეტიკური თვისებების მკაცრ შერჩევას აქვს თავისი უარყოფითი მხარეები. დღეს არსებულ ყველაზე პოპულარულ ჯიშებსაც კი აქვთ გარკვეული ფიზიკური თვისებები, რომლებიც იწვევენ ჯანმრთელობის პრობლემებს.
თუ თქვენ ამჟამად ეძებთ თქვენს მომავალ ოთხფეხა მეგობარს, ალბათ დაინტერესდებით იმით, თუ რომელი ძაღლის ჯიშს აქვს ყველაზე ნაკლები ჯანმრთელობის პრობლემა. რა თქმა უნდა, არის ჯიშები, რომლებსაც მემკვიდრეობით უფრო მეტი ჯანმრთელობის პრობლემა ერგოთ, მაგრამ, რეალურად, ახლა საკმაოდ რთულია იპოვოთ სუფთა ძაღლის ჯიში ჯანმრთელობის პრობლემების გარეშე.
როდესაც საქმე ეხება ძაღლის ჯიშის ჯანმრთელობის პრობლემებს, ყოველთვის ჯობია ინფორმირებულები იყოთ თქვენი არჩევანის შესახებ, ამიტომ ჩვენ მოვამზადეთ მოსახერხებელი გზამკვლევი ძაღლის ჯანმრთელობის საკითხებზე სხვადასხვა ჯიშის მიხედვით, რათა შეძლოთ გააზრებული არჩევანის გაკეთება თქვენი შინაური ცხოველის საჭიროებების შესწავლისას.
ᲑᲠᲐᲥᲘᲪᲔᲤᲐᲚᲘᲙᲔᲑᲘ (ᲑᲠᲢᲧᲔᲚᲡᲐᲮᲘᲐᲜᲘ ᲫᲐᲦᲚᲘᲡ ᲯᲘᲨᲔᲑᲘ)
ბრაქიცეფალურ ცხოველებს აქვთ მოკლე, ფართო თავის ქალა და ქვედა ყბა. ეს ანიჭებს მათ სახეებს უფრო ბრტყელ, “დაჭყლეტილ” იერს, სახეს, რომელიც ახლა ძალიან პოპულარული გახდა. ბრტყელსახიანი ძაღლების ჯიშებს მიეკუთვნება ფრანგული და ინგლისური ბულდოგები, პაგები, მოკრივეები, შიჰ ცუსი, ბულმასტიფები, ბოსტონის ტერიერები და ლასა აფსო და ა.შ.
ეს ჯიშები ძალიან პოპულარულები არიან და მათ შესაძლოა ჰქონდეთ შესანიშნავი ხასიათი და თვისებებიც, მაგრამ, სამწუხაროდ, მათმა გადაჭარბებულმა მახასიათებლებმა შეიძლება გამოიწვიოს ჯანმრთელობის მრავალი პრობლემა. ზოგადად, ბრაქიცეფალურ ძაღლებს დაბალი სიცოცხლის ხანგრძლივობა აქვთ.
აქ განხილული არის ჯანმრთელობის რამდენიმე პრობლემა, რომელიც შეიძლება შეექმნათ ამ ძაღლებს:
ᲑᲠᲐᲥᲘᲪᲔᲤᲐᲚᲘᲣᲠᲘ ᲝᲑᲡᲢᲠᲣᲥᲪᲘᲣᲚᲘ ᲡᲐᲡᲣᲜᲗᲥᲘ ᲒᲖᲔᲑᲘᲡ ᲡᲘᲜᲓᲠᲝᲛᲘ (BOAS)
ერთ-ერთი ყველაზე გავრცელებული ჯანმრთელობის პრობლემა, რომელიც გვხვდება ბრტყელსახიან ძაღლებში, არის სუნთქვის გაძნელება, რომელიც გამოწვეულია მათი ბრტყელი სახის კონფორმაციით. პატარა ნესტოების, წაგრძელებული სასის, მცირე ტრაქეისა და ჭარბი რბილი ქსოვილების ერთობლიობა, აფერხებს სასუნთქ გზებს, რაც იწვევს ხმაურიან სუნთქვას, ხვრინვას და ხველას. BOAS იწვევს რესპირატორულ პრობლემებს, რომლებიც მუდმივი და ხშირად პროგრესირებადია მთელი ცხოვრების განმავლობაში, ამან კი შეიძლება ხელი შეუშალოს ამ ძაღლების ყოველდღიური სიამოვნების მიღებას, როგორიცაა თამაში, ძილი და ჭამა.
ზოგიერთი ადამიანი ბულდოგის ჯიშის ხვრინვას საყვარლად მიიჩნევს, მაგრამ, ეს რეალურად იმის ნიშანია, რომ მათ არ შეუძლიათ სწორად სუნთქვა.
ᲑᲠᲐᲥᲘᲪᲔᲤᲐᲚᲘᲣᲠᲘ ᲗᲕᲐᲚᲘᲡ ᲡᲘᲜᲓᲠᲝᲛᲘ
ფრანგული ბულდოგების, პაგების და სხვა ბრაქიცეფალიური ძაღლების ჯანმრთელობის პრობლემების ერთ–ერთი ასპექტი მოიცავს შეშფოთებას მათ თვალებთან დაკავშირებით. ამ ჯიშის ზედაპირული თვალის ბუდეები იწვევს თვალის ამობურცვას, რამაც შეიძლება გამოიწვიოს თვალების არაადეკვატური ცრემლის საფარის პრობლემები. ამიტომ ხშირია რქოვანას (თვალის ზედაპირის) წყლული, რის გამოც ამ ძაღლებს ხშირად ესაჭიროებათ მედიკამენტებით მიშველება. ზოგიერთს შეიძლება ოპერაციაც კი დასჭირდეს ქუთუთოების ანომალიების გამოსასწორებლად. ცრემლსადენი სადინარის ანომალიები და ცრემლის გადინება ასევე გავრცელებულია, როგორც ფრანგული ბულდოგის ჯანმრთელობის პრობლემები, სხვა ბრტყელსახიან ჯიშებთან ერთად.
ᲠᲗᲣᲚᲘ ᲛᲨᲝᲑᲘᲐᲠᲝᲑᲐ
ბევრი ბრაქიცეფალიური ჯიში წვალობს ბუნებრივი მშობიარობისას, რაც ხშირად საჭიროებს ვეტერინარულ ჩარევას. ეს ჩვეულებრივ იმის გამო ხდება, რომ ლეკვის თავი და მხრები ბევრად დიდია დედის მენჯთან შედარებით. დისტოცია (რთული მშობიარობა) არის გადარჩენის რისკის ფაქტორი როგორც დედისთვის, ასევე ლეკვებისთვის.
ᲙᲐᲜᲘᲡ ᲓᲐᲐᲕᲐᲓᲔᲑᲐ
უფრო ბრტყელი სახის მქონე ძაღლებს ხშირად აქვთ კანის ზედმეტი ნაკეცები სახის ირგვლივ, თავის ქალის დამოკლების გამო. ეს ნაკეცები ადვილად შეიძლება დაინფიცირდეს ბაქტერიებით, რადგან დაკეცილი კანის შიგნით ბნელი და ტენიანი გარემო ხელს უწყობს მიკროორგანიზმების გავრცელებას. ეს განმეორებითი ინფექციები მტკივნეულია და შეიძლება გამოიწვიოს კანის სერიოზული დაზიანება. უფრო მძიმე შემთხვევებში შეიძლება საჭირო გახდეს მაკორექტირებელი ოპერაცია.
ᲡᲢᲝᲛᲐᲢᲝᲚᲝᲒᲘᲣᲠᲘ ᲓᲐᲐᲕᲐᲓᲔᲑᲐ
ფრანგული ბულდოგების, შიჰ ცუსის, ბოქსიორების, ბოსტონ ტერიერების და სხვა ბრტყელსახიანი ჯიშების ჯანმრთელობის პრობლემების სიაში შედის სტომატოლოგიური პრობლემებიც. ერთი და იგივე რაოდენობის კბილების მორგება დაჭყლეტილ და ბრტყელ სახეზე იწვევს კბილების გადატვირთულობას. ეს კი იწვევს კბილის ნადების, გინგივიტის და კბილების პოტენციურ დაკარგვას, შესაბამისად, ამ ჯიშებს შეიძლება დასჭირდეთ ვეტერინარებთან ძვირადღირებული და არასასიამოვნო სტომატოლოგიური ჩარევა.
ᲜᲝᲠᲛᲐᲚᲣᲠᲘ ᲥᲪᲔᲕᲘᲡ ᲨᲔᲡᲠᲣᲚᲔᲑᲘᲡ ᲣᲜᲐᲠᲘ
ბრაქიცეფალიური მოშენება იმდენად ექსტრემალური გახდა, რომ ზოგიერთი ლეკვი ძაღლის ბუნებრივი ქცევის შესასრულების და ყოველდღიურ ცხოვრებასთან შეგუების დროსაც კი წვალობს. სუნთქვის გარდა, ბრტყელსახიან ჯიშებს უჭირთ კვება, ძილი და სხვა ძაღლებთან ურთიერთობა.
ᲤᲠᲐᲜᲒᲣᲚᲘ ᲑᲣᲚᲓᲝᲒᲘᲡ ᲯᲐᲜᲛᲠᲗᲔᲚᲝᲑᲘᲡ ᲞᲠᲝᲑᲚᲔᲛᲔᲑᲘ
ფრანგული ბულდოგი ბოლო რამდენიმე წლის განმავლობაში ძალიან პოპულარული ჯიში გახდა. თუმცა, სამწუხაროდ, ისინი განიცდიან ჯანმრთელობის მრავალ ჩივილს მათი ექსტრემალური მოშენების გამო. ფრანგული ბულდოგის ჯანმრთელობის პრობლემები მრავალრიცხოვანია და მოიცავს შემდეგს:
- BOAS რესპირატორული სინდრომი
- კანის ალერგია
- კანის ნაოჭების დერმატიტი
- ყურის დაავადება
- ზურგის დისკის დაავადება
- თვალის დაავადება: წყლულები, თვალის სიმშრალე, ალუბლის თვალი და კონიუნქტივიტი
- სტომატოლოგიური დაავადება
ᲪᲣᲓᲘ ᲙᲝᲜᲤᲝᲠᲛᲐᲪᲘᲐ
როდესაც საქმე სხეულის სიგრძეს ეხება, სწორი პროპორციების ქონას – კიდურების სიგრძისა და წონა-ზომის თანაფარდობას, არ აქვს მხოლოდ ესთეტიკურობის დანიშნულება: უჩვეულო ან ექსტრემალური კონფორმაციის არსებობამ შეიძლება გამოიწვიოს ტკივილი და დისკომფორტი, დააზიანოს ნერვები და გამოიწვიოს მიდრეკილება ძვალკუნთოვანი მდგომარეობებისკენ.
არსებობს სხვადასხვა ექსტრემალური კონფორმაციებიც, რომლებიც გვხვდება თანამედროვე ძაღლების ჯიშებში.
ᲛᲝᲙᲚᲔ ᲙᲘᲓᲣᲠᲔᲑᲘ ᲒᲠᲫᲔᲚᲘ ᲡᲮᲔᲣᲚᲘᲗ
ეს აღწერა მოიცავს ისეთ ჯიშებს, როგორებიცაა ტაქსა, კორგი, ბასეტ ჰაუნდი, პეკინესი ან სკაიტერიერი – მსოფლიოში ყველაზე გრძელი ჯიშები. ხერხემლის პრობლემებისა და მალთაშუა დისკების დაავადების რისკი გრძელი ტანის ძაღლების ჯანმრთელობის ერთ-ერთი ცნობილი პრობლემაა. თუმცა, ტაქსებთან და მსგავს ჯიშებთან დაკავშირებული ჯანმრთელობის პრობლემები ხშირად ასევე მოიცავს არანორმალურ სახსრებსა და კიდურების დეფორმაციას, რაც არამარტო ამცირებს ამ ძაღლების აქტიურობას და ვარჯიშის ტოლერანტობას, არამედ ზრდის ართრიტისკენ მიდრეკილებასაც. სხვა ჯიშებზე გავლენას ახდენს მათი სიმაღლეც. კორგის ჯანმრთელობის პრობლემები, მაგალითად, მოიცავს ბარძაყისა და იდაყვის დისპლაზიას და დეგენერაციულ მიელოპათიას, აგრეთვე ხერხემლის პოტენციურ პრობლემებს.
„მინიატურული“ ჯიშების პოპულარობა, როგორიცაა ჯიბის პიტბული, იზრდება, მაგრამ მათ ასევე გააჩნიათ ზოგიერთი შემაშფოთებელი მახასიათებელი, როგორიცაა კიდურების დეფორმაციები და შემცირებული მოქნილობა ნორმალური ქცევის შესასრულებლად.
ᲢᲐᲥᲡᲐᲡ ᲯᲐᲜᲛᲠᲗᲔᲚᲝᲑᲘᲡ ᲞᲠᲝᲑᲚᲔᲛᲔᲑᲘ:
ეს უცნაური ფორმის ძაღლები დიდი ხანია პოპულარულია საგვარეულო შინაურ ცხოველებში, მაგრამ ტაქსას ჯანმრთელობის პრობლემების ჩამონათვალი საკმაოდ დამაფიქრებელია:
- მალთაშუა დისკის დაავადება
- გულის დაავადება (შემჩნეულია მინიატურულ ტაქსაში)
- პროგრესირებადი ბადურის ატროფია – ეს მდგომარეობა იწვევს მხედველობის თანდათანობით დაკარგვას.
- თვალის სიმშრალე
ᲛᲫᲘᲛᲔ ᲓᲐᲨᲔᲜᲔᲑᲐ ᲞᲐᲢᲐᲠᲐ ᲡᲐᲤᲣᲫᲕᲔᲚᲖᲔ
ბულდოგის ჯიშები, სტაფორდშირული ბულტერიერები, ამერიკელი პიტბულები და მოპსები არიან მძიმე ძაღლები პროპორციულად პატარა კიდურებით. მათ ხშირად აღწერენ, როგორც “დიდ ძვლიანებს”, მძიმე, გუმბათის ფორმის თავით. ეს დამატებითი წონა დიდ დატვირთვას აყენებს მათ კიდურებსა და სახსრებს. ამან შეიძლება გამოიწვიოს ფეხის თითების მტკივნეული აფცქვნა, ფრჩხილების დარღვევა და სახსრების ადრეული ართრიტული ცვლილებები.
ᲑᲐᲠᲫᲐᲧᲘᲡᲐ ᲓᲐ ᲘᲓᲐᲧᲕᲘᲡ ᲓᲘᲡᲞᲚᲐᲖᲘᲐ
“დისპლაზია” არის სამედიცინო ტერმინი, რომელიც ნიშნავს არანორმალურ განვითარებას. ბარძაყისა და იდაყვის დისპლაზიის დროს სახსრები არ ყალიბდება სწორად, რაც იწვევს მოძრაობის და ტკივილის შემცირებას. ეს ძაღლები ჩვეულებრივ იტანჯებიან ადრეული და პროგრესირებადი ართრიტით. ეს ჩვეულებრივ დიდ და გიგანტურ ჯიშის ძაღლებში გვხვდება, რომლებიც დიდი წონით აწვებიან სწრაფად მზარდ სახსრებს მათი ზომის გამო. ბარძაყისა და იდაყვის დისპლაზია ხშირია ლაბრადორებში, რეტრივერებში, როტვეილერებში, ბერნულ ზენენჰუნდში, ნიუფაუნდლენდში და გერმანულ ნაგაზებში.
ᲒᲔᲠᲛᲐᲜᲣᲚᲘ ᲜᲐᲒᲐᲖᲘᲡ ᲯᲐᲜᲛᲠᲗᲔᲚᲝᲑᲘᲡ ᲞᲠᲝᲑᲚᲔᲛᲔᲑᲘ
გნებავთ უფრო დიდი ზომის ძაღლი? ამ შემთხვევაში გადაავლეთ თვალი გერმანული ნაგაზის ჯანმრთელობის პრობლემების სიას:
- ბარძაყის დისპლაზია
- იდაყვის დისპლაზია
- დეგენერაციული მიელოპათია
- პანუსი – თვალის პროგრესირებადი მდგომარეობა
- კუჭის დილატაცია და ვოლვულუსი
- გრაცილის კუნთების კონტრაქტურა
ᲨᲔᲖᲠᲓᲘᲚᲘᲘ ᲙᲣᲓᲘ
ბრაქიცეფალური ჯიშების ქვეჯგუფს აქვს შემდგომი დეფორმაცია – ამჯერად კუდის. მოპსის, ბოსტონ–ტერიერის, ინგლისური და ფრანგული ბულდოგის ჯანმრთელობის მრავალი პრობლემიდან ერთ-ერთი, ხვეული, „ღორის მსგავსი“ კუდია. ეს პრობლემა გამოწვეულია ხერხემლის გენეტიკური მანკით, რომლის დროსაც კუდის შემადგენელი ძვლები ორივე შემცირებულია, ამიტომ კუდი მოკლეა და ერთმანეთთან ისეა შერწყმული, რომ იგი ხვეულ ფორმას იღებს.
ეს მტანჯველი მდგომარეობა შეიძლება საკმაოდ უვნებელად გამოიყურებოდეს, მაგრამ რეალურად ის იწვევს მთელ რიგ პრობლემებს. შეზრდილი კუდის მქონე ძაღლებს უფრო მეტად აქვთ ხერხემლის შემდგომი დეფორმაციები, რაც იწვევს ნერვულ პრობლემებს, ტკივილს და შეუკავებლობას. მათ ასევე ხშირად აწუხებთ კანის ინფექციები კუდის დახვეული უბნების გარშემო.
ᲒᲠᲫᲔᲚᲘ ᲧᲣᲠᲔᲑᲘ
თქვენ შეიძლება ძალიან საყვარლად მოგეჩვენოთ ძაღლის გრძელი, ჩამოშლილი ყურები, მაგრამ ისინი რეალურად ქრონიკულ ინფექციებს ატარებენ. ძაღლები კომუნიკაციისთვის იყენებენ სხეულის ენას და პოზას, ხოლო ორივე მოჭრილი და გრძელი ყური ხელს უშლის ამ ნორმალურ ქცევას. ბასეტ ჰაუნდის ჯანმრთელობის ერთ-ერთი კლასიკური პრობლემა, ყურის ქრონიკული ინფექციაა, რაც იწვევს ქავილს, არის მტკივნეული და შეიძლება გამოიწვიოს სმენის დაკარგვაც კი.
ᲑᲔᲬᲕᲘᲡᲐ ᲓᲐ ᲙᲐᲜᲘᲡ ᲓᲐᲠᲦᲕᲔᲕᲔᲑᲘ
თქვენ შეგიძლიათ იპოვოთ ძაღლები თითქმის ყველა ტიპის ბეწვით: გრძელთმიანი ან მოკლებეწვიანი, უხეში ან გლუვი, ყველა განსხვავებული ფერითა და ტექსტურით. თქვენ შეიძლება ნახოთ ისეთი ძაღლებიც კი, რომლებსაც თმა საერთოდ არ აქვთ, მაგრამ არის თუ არა ეს მხოლოდ გარეგნობის საკითხი? ან შეიძლება თუ არა, რომ თქვენი ძაღლის კანმა და ბეწვმა გავლენა იქონიოს მათ ჯანმრთელობაზე?
ᲭᲐᲠᲑᲘ ᲙᲐᲜᲘ
ძაღლების ჯიშები, როგორიცაა ბასეტ ჰაუნდი, შარ პეი, ბლადჰაუნდი და მასტიფი, მარტივად ამოსაცნობია, ნაწილობრივ, მათი დამახასიათებელი ნაოჭებისა და კანის ნაკეცების გამო. კანის ასეთი გადაჭარბებული რაოდენობა ნებისმიერ ადგილას იწვევს კანის ქრონიკულ პრობლემებს, როგორებიცაა ინფექციები და ჭრილობები. გარდა ამისა, თვალების ირგვლივ ზედმეტმა კანმა შეიძლება გამოიწვიოს რქოვანას დაზიანება, ინფექციები და ცრემლის გადინება.
ᲑᲐᲡᲔᲢ ᲰᲐᲣᲜᲓᲘᲡ ᲯᲐᲜᲛᲠᲗᲔᲚᲝᲑᲘᲡ ᲞᲠᲝᲑᲚᲔᲛᲔᲑᲘ
მოგწონთ ამ დახრილყურებიანი ძაღლის სახე? თუ ასეა, გადახედეთ მათ საერთო ჯანმრთელობის ჩივილებს:
- კანის ნაოჭების დერმატიტი
- ყურის დაავადება
- იდაყვის დისპლაზია
- მალთაშუა დისკის დაავადება
- თვალის პრობლემები, მათ შორის გლაუკომა
- კუჭის დილატაცია და ვოლვულუსი
ᲣᲑᲔᲬᲕᲝ ᲫᲐᲦᲚᲘᲡ ᲯᲘᲨᲔᲑᲘ
მელოტი ჯიშები, როგორებიცაა მექსიკური უბეწვო ძაღლი და ჩინური უბეწვო ძაღლი, სპეციალურად არიან გამოყვანილები, როგორც უთმო ძაღლები. გარდა იმისა, რომ ისინი ზომიერ ტემპერატურაზე ცივდებიან, მათ თბილ ამინდში მზის დამწვრობის მიღებაც კი შეუძლიათ. ძაღლებისთვის მოვლას მნიშვნელოვანი როლი უჭირავს, ხოლო ბეწვის არ არსებობამ შეიძლება გამოიწვიოს გარკვეული ქცევითი პრობლემები. ჩინურ უბეწვო ძაღლს, ისევე როგორც სხვა მელოტ ჯიშებს, შეიძლება აწუხებდეს როგორც მშრალი, ისე ცხიმიანი კანი, თმის ფოლიკულებისა და კანის ცხიმის წარმოქმნის გამო.
ᲛᲔᲠᲚᲘᲡ ᲨᲔᲦᲔᲑᲕᲐ
მერლის მქონე ბეწვი ძალზე გამორჩეულია და მოიცავს მუქი ბეწვის არარეგულარულ კონფიგურაციას უფრო ღია ფერის ფონზე. მერლის მქონე ბეწვი შეიძლება შეგვხვდეს უამრავ ფერში და, ასევე, უამრავ ჯიშში, მაგალითად, ცისფერი მერლე ბორდერ-კოლში ან წითელი მერლე ფრანგული ბულდოგში. გენი, რომელიც ატარებს მერლის თვისებას, არის დომინანტი (M), მაგრამ ეს ასევე შეიძლება დაკავშირებული იყოს ჯანმრთელობის ზოგიერთ პრობლემასთან, როგორიცაა სმენის და მხედველობის დაქვეითება. ეს ვლინდება ჰომოზიგოტურ “M” ძაღლებში, რომლებსაც აქვთ მერლის დომინანტური გენის ორი ასლი და შეიძლება იყვნენ ბრმები და/ან ყრუები.
ᲛᲒᲚᲘᲡ ᲰᲘᲑᲠᲘᲓᲔᲑᲘ
მგლის ძაღლი წარმოიშობა შინაური ძაღლის მგელთან შეჯვარებით. ამის მაგალითებია საარლოს მგლის ძაღლი, რომელიც არის გერმანული ნაგაზის ნაჯვარი ევროპულ მგელთან და ჩეხოსლოვაკიური მგელი, რომელიც არის გერმანული ნაგაზისა და მგლის ნაჯვარი. ამგვარი შეჯვარებები არ არის რეკომენდირებული შინაური ცხოველებისთვის, რადგან ისინი ხშირად ინარჩუნებენ ველური მგლის მახასიათებლებს და შეიძლება ჰქონდეთ შესამჩნევი ქცევითი პრობლემები, მათ შორის აგრესიული და მტაცებელური გამოვლინებები. მათი ყოლა და მოშენება კონტროლდება ლიცენზიით.
ᲯᲘᲨᲔᲑᲘᲡ ᲯᲐᲜᲛᲠᲗᲔᲚᲝᲑᲘᲡ ᲞᲠᲝᲑᲚᲔᲛᲔᲑᲘ: ᲡᲐᲑᲝᲚᲝᲝ ᲛᲝᲡᲐᲖᲠᲔᲑᲔᲑᲘ
ამ სამყაროში უამრავი ძაღლია, რომლიც ცხოვრობს საუკეთესო ცხოვრებით. ასეთი ძაღლები არიან ჯანმრთელები, ბედნიერები, შეუძლიათ კარგი კომუნიკაცია და ბუნებრივი ქცევების შესრულება. ისინი თავისუფლები არიან დისკომფორტისგან, ტკივილისგან, ავადმყოფობისა და დაავადებებისგან. სამწუხაროდ, ჩვენმა გარკვეული თვისებების ქონის სურვილმა ცხოველებში გამოიწვია ზოგიერთ ყველაზე პოპულარულ ჯიშში გარკვეული ფიზიკური მახასიათებლების მქონე ძაღლების მოშენება, რომლებსაც რეალურად აქვთ ზიანის მიყენების პოტენციალი. მნიშვნელოვანია, რომ ყოველთვის ჩაატაროთ კვლევა ლეკვის არჩევისას, რადგან ჩვენ ყველას უნდა გვქონდეს საუკეთესო ინტერესები ჩვენი საყვარელი ოთხფეხა მეგობრების მიმართ.
